ابڙو اڪيڊمي Abro Academy
2020-07-22
داخلا نمبر 625
عنوان سانهه ڄاهو
شاخ پکي
پڙهيو ويو 393
داخلا جو حوالو:
سانهه ڄاهو
سانهه ڄاهو
150 سينٽي ميٽر جسامت واري (ٻگهه جنس جي) هن پکيءَ جا نر ماد به هڪجهڙا ٿين ٿا. اهو دنيا جو ڊگهي ۾ ڊگهو ٻگهه آهي. ان جون اکيون هيڊيون، پٺي سرمائي ناسي؛ ڪلها، مٿو ۽ هيٺيون جسم ناسي رنگ جو؛ ڳچي تي مرمرين اڇا ڪارا لينگها ٿين ٿا ۽ ڳچيءَ وٽان کنڀن جي لڙي لڙ ڪندي رهي ٿي.
ڄاهو سانهه پنهنجي ڊگهي ڳچيءَ کي اندر ڪري ڪلهي تي رکي گُج ڪڍي بي حرڪت بيٺو هوندو آهي يا وري هوريان هوريان پنڌ پيو ڪندو آهي. وڏين ڍنڍن، ڌٻڻين جي ڪنڌين تي نظر ايندو آهي. جڏهن لڳ جي مند نه هوندي آهي تڏهن اڪثر اڪيلو يا جوڙيءَ ۾ نظر ايندو آهي. اڪثر روزانو ساڳئي هنڌ مڇيءَ جو شڪار ڪندو آهي. عام طور گهاٽي گاهه ۽ ترندڙ پنن ۾ شڪار لاءِ ويندو آهي ۽ پاڻي جهاڳندو پيٽ تائين هليو ويندو آهي. شڪار تي حملي مهل جسم، مٿو ۽ گُڪ نڪتل ڳچي پاڻيءَ جي سطح تائين جهڪائيندو آهي. ڳچيءَ ۾ هڪ وڪڙ هوندو اٿس جيڪو هڪدم سڌو ٿي سگهندو آهي، ايئن منڍيءَ سان تکو حملو ڪندو آهي ۽ شڪار تيز چهنب ۾ ڦاسي پوندو آهي. مڇي، ڏيڏر، ننڍڙا مماليا، ڪِرڙانگ ۽ غير ڪِرنگھيدار جانور کائي ويندو آهي. ڄاهو سانهه جو آواز تکو، ورجاءُ وارو ۽ چيخدار ھوندو آهي. اڏار هوريان ۽ ڳري اٿس جنهن دوران ٽنگون لڙڪيل هونديون آهن. ھي پکي وڻ يا زمين تي جوڙن ۾ آکيرو ٺاهيندا آهن، جيڪو ڪاٺين ۽ ڪانن جي ڍڳ تي مشتمل ٿئي ٿو. آرام مهل هڪ ٽنگ تي بيهندو آهي. ھي ماحول : 7 جو پکي آھي.